Hitti fyrir gamlan kunningja norðarlega í Smugunni

ESKS. Steffano EK 16-01 ex Steffen C GR 6-22. Ljósmynd Eiríkur Sigurðsson 2019.

Alltaf gaman að fá gamla „kunningja“ í heimsókn segir Eiríkur Sigurðsson skipstjóri á rækjutogaranum Reval Viking við mynd sína í Fésbókarfærslu hans í dag.

Myndin er af rækjutogaranum Steffano sem er í eigu sama fyrirtækis og Reval Viking, Reyktal AS en þeir eru skráðir í Eistlandi með heimahöfn í Tallinn.

Skipstjóri á Steffano er Guðmundur Bárðarson sem var stýrimaður á Gumundi í Nesi RE 13 sem eins og kunnugt er var seldur til Grænlands fyrir stuttu. Áður var Guðmundur stýrimaður á Pétri Jónssyni RE 69.

„Við vorum norðarlega í Smugunni og hittumst þarna í gær“ sagði Eiríkur í spjalli við mig áðan en hann var með Steffano í nokkur ár þegar togarinn hét Pétur Jónsson RE 69.

2003-2007 minnti hann en það var einmitt árið 2005 sem Eiríkur og áhöfn hans lentu í atviki á Flæmska hattinum og rataði eðlilega í fjölmiðla og lesa má um hér

Léttbáturinn á Steffano. Ljósmynd Eiríkur Sigurðsson 2019.

Þarna var um að ræða þegar rækjutogarinn Gideon sökk og Eiríkur og hans menn á Pétri Jónssyni RE 69 björguðu áhöfninni. Léttabáturinn á myndinni hér að ofan er einmitt sá sem notaður var þá sem og í Smugunni í gær.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Hafbjörg EA 23

62. Hafbjörg EA 23 ex Jón Bjarnason SF 3. Ljósmynd Hafþór Hreiðarsson.

Hér siglir Hafbjörg EA 23 frá Hauganes eftir að hafa verið skveruð í Slippstöðinni á Akureyri.

Hafbjörg EA 23 hét upphaflega Gísli lóðs GK 130 og var smíðaður fyrir Jón Gíslason útgerðarmann í Hafnarfirði árið 1961.

Í Morgunblaðinu 1. desember 1961 sagði svo frá komu Gísla lóðs til heimahafnar í Hafnarfirði:

Fyrir síðustu helgi kom hingað nýr bátur, sem Jón Gíslason á. Heitir hann Gísli lóðs, eftir föður Jóns, sem var hér hafnsögumaður og vitavörður um 30 ára skeið. 

Báturinn, sem smíðaður er í Fredriksund í Danmörku er 100 rúmlestir og var byrjað á smíði hans í febrúar s.l. Hann hefir 460 hestafla Alfa-diesel vél og 30 afla ljósavél af Bukhgerð.

Þá eru í honum öll nýtízku siglingatæki, svo sem Kelvin ratsjá, Zimrad Asdic siglingatæki, dýptarmælir og talstöð af sömu gerð. Ljósmiðunarstöð er japönsk og sjálfstýrisvél Robertson.

Gísli lóðs er hið prýðilegasta sjóskip, að því er skipstjórinn Helgi Aðalgeirsson frá Grindavík sagði blaðinu. Hann kvað allan frágang með ágætum og káetaog klefar skipsmanna væru rúmgóðir. Hvalbakurinn og brúin eru úr aluminíum. 

Báturinn er hitaður upp með rafmagni og eldavélin er frá Rafha. Hann er með kraftblökk og sagði Helgi að hann gæti rúmað 1200—1300 tn. síldar, en á þær veiðar fer hannum helgina. — Helgi var áður með Faxaborgina. 

Svo mörg voru þau orð en báturinn átti eftir að heita ýmsum nöfnum, s.s Hringur GK 18, Ásgeir Torfason ÍS 96, Dalaröst ÁR 63 og Jón Bjarnason SF 3 áður en hann fékk nafnið Hafbjörg EA 23. Hafbjörg var í eigu Auðbjargar s/f á Hauganesi við Eyjafjörð sem átti einnig Auðbjörgu EA 22.

Því næst hét hann Dóri á Býja Gk 101 og að lokum Íslandía GK 101.

Hann á að hafa verið seldur til Danmerkur á tíunda tug síðustu aldar en aldrei komist lengra en til Runavíkur í Færeyjum þar sem hann dagaði upp. Tekinn af skrá upp úr aldarmótunum.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Vigur SF 80

2880. Vigur SF 80. Ljósmynd Þór Jónsson.

Vigur SF 80 er bátur sem ég held að hafi ekki birst fyrr á þeim skipamyndasíðum sem ég hef haldið úti en hér kemur hann.

Það var Þór Jónsson á Djúpavogi sem tók þessar myndir og ljáði mér afnot af þeim. Við eigum eftir að njóta fleiri mynda frá Þór í framtíðinni.

Vigur SF 80 var smíðaður af Víkingbátum í Reykjavík árið 2015 fyrir útgerðarfélagið Vigur, dótturfyrirtæki Skinneyjar Þinganess hf. Vigur, sem er af gerðini Víkingur 1500, stundar línuveiðar með beitningarvél í krókaaflamarkskerfinu.

2880. Vigur SF 80. Ljósmynd Þór Jónsson.

Vigur SF 80 er 14,82 metrar að lengd, 4,42 metrar á breidd og mælist 29,90 BT að stærð. Aðalvélin 756 hestafla Yanmar.

2880. Vigur SF 80. Ljósmynd Þór Jónsson 2015.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Viðey RE 50 á toginu

Viðey RE 50. Ljósmynd Hólmgeir Austfjörð 2019.

Viðey RE 50 er hér að veiðum á miðunum sunnan við land um helgina en hún er eins og kunnugt er  eitt þriggja systurskipa sem HB Grandi lét smíða í Tyrklandi.

Viðey RE 50 leysti Ottó N Þorláksson RE 203 af hólmi og svo skemmtilega vill til að þessar myndir eru teknar um borð í Ottó N Þorlákssyni, nú VE 5.

Viðey RE 50. Ljósmynd Hólmgeir Austfjörð 2019.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution