1380. Búi EA 100 ex Fjalar ÍS 54. Ljósmynd Hreiðar Olgeirsson.
Búi EA 100 hét upphaflega Fjarðará KE 23 og var smíðaður árð 1971 í Skipasmíðastöð Nóa Kristjánssonar á Akureyri.
Á vef Árna Björns Árnasonar, aba.is segir:
Smíðaður fyrir Sigurbjörn Sigurjónsson, Keflavík, sem átti bátinn í tvö ár. Samkvæmt ritinu „Íslensk skip“ þá var báturinn dekkaður þriggja ára gamall á Kópaskeri og fékk þá nafnið Fjalar ÞH-188.
Frá Kópaskeri fór báturinn að Botnsskála í Hvalfirði og hét þar Fjalar MB-18. Frá Hvalfirði lá leið hans á Þingeyri þar sem hann fékk nafnið Fjalar ÍS-54. Árið 1980 kom báturinn til Dalvíkur og hét þar Búi EA-100.
Siglingastofnum skráir bátinn síðan á Grenivík sem Frosta ll ÞH-220 þá á Ólafsfjörð sem Hafey ÓF-5 og síðast á Hofsós, sem Hafey SK-9.
Báturinn hét Hafey SK-9 er hann var notaður í áramótabrennu 31. desember árið 2000. Hann var síðan felldur af skipaskrá 17. janúar. 2001.
Með því að smella á myndina er hægt að skoða hana í hærri upplausn.
By clicking on the images you can view them in higher resolution
1472. Klakkur ÍS 903 ex Ísborg II ÍS 260. Ljósmynd Hafþór Hreiðarsson 2020.
Skuttogarinn Klakkur ÍS 903, sem stundar rækjuveiðar, liggur við Norðurgarðinn á Húsavík og var myndin tekin fyrir stundu.
Tjaldtangi ehf. á Ísafirði er eigandi Klakks sem er með heimahöfn á Flateyri.
Klakkur hét um stuttan tíma Ísborg II ÍS 260 en hét áður Klakkur SK 5, Klakkur SH 510 og Klakkur VE 103. Smíðaður árið 1977 í Gdynia í Póllandi.
Hafliði Óskarsson var á bryggjunni og sagði mér að Klakkur hefði tengingu til Húsavíkur. Hún er sú að Barðinn hf., þá í Kópavogi, samdi um smíði á togaranum sem á smíðatíma fékk nafni Klakkur.
Það nafn mun vera komið frá sexæringnum Klakki sem var fyrsti bátur þeirra Borgarhólsbræðra, Stefáns og Þórs Péturssona, sem síðar stofnuðu Barðann hf. á Húsavík.
En ekki fór það svo að Barðinn tæki við togaranum því á smíðatímanum var hann seldur til Vestmannaeyja.
Í Vísi þann 12. ágúst 1976 mátti lesa eftirfarandi frétt:
Þrír stærstu útgerðaraðilar í Eyjum, Ísfélag Vestmannaeyja, Fiskiðjan og Vinnslustöðin, hafa stofnað hlutafélagið Klakk. Meginmarkmið hins nýja hlutafélags er að kaupa og reka skuttogara sem gerður verður út frá Eyjum.
Formaður hins nýja félags er Guðmundur Karlsson. Guðmundur sagði í samtali við Vísi í morgun, að þegar reynt var að fá leyfi til skuttogarakaupa erlendis frá á sínum tíma, þá hefðu þessir aðilar ekki fengið tilskilin leyfi yfirvalda.
Nú hefði Klakkur hf. hins vegar yfirtekið kaup Barðans hf. í Kópavogi á skuttogara í Póllandi, og gengi Klakkur algjörlega inn í þann samning sem Barðinn hefði verið búinn að gera, og yfirtæki þá um leið þá aðstoð sem hið opinbera veitti Barðanum hf.
Guðmundur sagði að hið nýja skip væri væntanlegt til Vestmannaeyja um áramótin, en skipið er um 490 tonn að stærð.
Nú er aðeins einn skuttogari gerður út frá Eyjum, skuttogarinn Vestmannaey.
Svo mörg voru þau orð en Klakkur var gerður út frá Eyjum til ársins 1993 er hann var seldur til Grundarfjarðar.
Bryggjuspjall, Hafliði Óskarsson og Björn Rúnar Agnarsson.
1472. Klakkur ÍS 903 ex Ísborg II ÍS 260. Ljósmynd Hafþór Hreiðarsson 2020.
Með því að smella á myndirnar er hægt að skoða þær í hærri upplausn.
By clicking on the images you can view them in higher resolution
Jón Steinar tók þessa myndasyrpu af Bylgju VE 75 í gær þegar hún fór, kom og fór aftur frá Grindavík.
Eins og Jón segir:
Hér er Bylgja að fara út fyrr í dag, en hún kom inn til löndunar í Grindavík um síðastliðna helgi. Ástæðan fyrir löngu stoppi var að það var farið að blása undan heddum á aðalvélinni og þörf var á að kippa því í liðinn. Hún snéri nú við skömmu eftir að látið var úr höfn þar sem hlutirnir voru ekki alveg eins og þeir áttu að vera. Því var kippt í liðinn á skömmum tíma og hélt hún úr höfn skömmu síðar.
Bylgjan er hönnuð sem skuttogari með búnað til vinnslu og frystingar á flökum og smíðuð 1992 af Slippstöðinni á Akureyri og er nýsmíði stöðvarinnar númer 70. Smíði skipsins hófst nokkrum árum áður án kaupanda og lá skipið í nokkurn tíma áður en það seldist.Bylgja VE 75 er gerð út af samnendu fyrirtæki sem Matthías Óskarsson stendur að. Vísir hf í Grindavík leigir og gerir Bylgju út um þessar mundir.
2025. Bylgja VE 75. Ljósmyndir Jón Steinar 2020.
Með því að smella á myndirnar er hægt að skoða þær í hærri upplausn.
By clicking on the images you can view them in higher resolution
2965. Bárður SH 81 í Húsavíkurhöfn í kvöld. Ljósmynd Hafþór Hreiðarsson.
Það var logn og blíða á Húsavík í dag og það sama var upp á teningnum í kvöld þegar Bárður SH 81 var að landa afla sínum.
Aftan við Bárð lá Hafborgin sem landaði síðdegis og ef minni mitt svíkur ekki eru þetta tveir nýjustu neta- og dragnótbátar flotans. Báðir smíðaðir í Danmörku.
2965. Bárður SH 81 – 2940. Hafborg EA 152. Ljósmyndir Hafþór Hreiðarsson 2020.
Með því að smella á myndirnar er hægt að skoða þær í hærri upplausn.
By clicking on the images you can view them in higher resolution
1345. Blængur NK 125 ex Freri RE 73. Ljósmynd Hafþór Hreiðarsson 2020.
Frystitogarinn Blængur NK 125 frá Neskaupstað kom inn Skjálfandann síðdegis í dag og stoppaði um stund framan við höfnina á Húsavík hvar léttabátur fór að bryggju.
Heppnin var með mér er ég sá til skólabróðurs sem var að koma að landi eftir að hafa verið að veiða í soðið, og var hann meira en til í það að fara með mig til móts við Blæng og mynda hann. Takk Siddi.
Blængur NK 125 hét upphaflega Ingólfur Arnarson RE 210, og var einn stóru Spánartogaranna svokölluðu og sá eini sem er enn í fiskiskipaflotanum.
Hann var smíðaður fyrir Bæjarútgerð Reykjavíkur árið 1973 í Astilleros Luzuriaga S.A. skipasmíðastöðinni í Pasajes de San Juan í Baskalandi.
Ögurvík hf. keypti Ingólf Arnarson RE 210 árið 1985 og gaf honum nafnið Freri RE 73. Honum var í framhaldinu breytt í frystitogara í Slippstöðinni á Akureyri.
Árið 2000 fór Freri RE 73 til Póllands umfangsmiklar breytingar þar sem fólust m.a í því að hann var lengdur um 10 metra og skipt um aðalvél. Togarinn er nú tæplega 79 metrar og í honum er 5000 hestafla Wartsila aðalvél.
Síldarvinnslan hf. festi kaup á Frera RE 73 í júní 2015 og fékk hann nafnið Blængur NK 125.
Eftir að Síldarvinnslan eignaðist Blæng NK 125 fór togarinn í gagngerar endurbætur í Póllandi og ný vinnslulína var sett í hann hjá Slippnum á Akureyri.
Blængur NK 125 hóf veiðar fyrir Síldarvinnsluna í febrúar 2017.
1345. Blængur NK 125 ex Freri RE 73. Ljósmyndir Hafþór Hreiðarsson 2020.
Með því að smella á myndirnar er hægt að skoða þær í hærri upplausn.
By clicking on the images you can view them in higher resolution
Þær myndir sem nú birtast voru teknar í septembermánuði 2012 þegar Kristinn ÞH 163 kom til Húsavíkur í skverun og einnig þegar hann fór að henni lokinni.
Kristinn ÞH 163 er í eigu Hólmsteins Helgasonar ehf. á Raufarhöfn sem keypti hann nánast nýjan. Báturinn var smíðaður fyrir Kóp KE 8 ehf. hjá Bátagerðinni Samtak í Hafnarfirði árið 2006 og hét hann Kópur HF 44.
