Auður Þórunn ÞH 344

2485. Auður Þórunn ÞH 344 ex Narfi SU 680. Ljósmynd Hafþór Hreiðarsson 2004.

Auður Þórunn ÞH 344 var gerð út frá Húsavík um skeið en Hraunhöfði ehf. keypti bátinn frá Stöðvarfirði í desembermánuði 2004.

Að því fyrirtæki stóðu bræðurnir Hermann A. Sigurðsson og Kristján Fr. Sigurðsson sem nefndu bátinn eftir móður sinni.

Báturinn hét áður Narfi SU 68 og var smíðaður í Trefjum í Hafnarfirði og var af gerðinni Cleopatra 31. Hann var 8 brl. að stærð.

Sumarið 2007 keypti Útgerðarfélag Bolungarvíkur ehf. bátinn og nefndi Björgmund ÍS 49 en ári síðar var hann seldur úr landi.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Langanes GK 525

1202. Langanes GK 525 ex Grundfirðingur SH 12. Ljósmynd Elvar Jósefsson 2020.

Netabáturinn Langanes GK 525 hefur hafið róðra og þessar myndir tók Elvar Jósefsson í gær þegar báturinn kom til hafnar í Sandgerði.

Eins og kannski glöggir menn sjá er þetta gamli Grundfirðingur SH 12 en eins og komið hefur fram á síðunni keypti fyrirtæki Hólmgríms Sigvaldasonar, Grímsnes ehf., bátinn í fyrra.

Báturinn hét upphaflega Þorlákur ÁR 5 og  var smíðaður hjá Stálvík í Garðabæ 1972 fyrir Meitilinn h/f í Þorlákshöfn. Smíðanúmer 18 frá þeim og afhentur í upphafi árs.

Árið 1977 fékk hann nafnið Brimnes SH 257 og 1979 Rita NS 13, heimahöfn Vopnafjörður. Á vetrarvertíðinn 1982 er báturinn kominn til Hafnarfjarðar þar sem hann fék nafnið Hringur GK 18. 

Í upphafi árs 2001 var báturinn keyptur til Grundarfjarðar, kaupandinn Soffanías Cesilsson hf., og fékk hann nafnið Grundfirðingur SH 24.

Báturinn var lengdur 1973, yfirbyggður 1985 og aftur lengdur 1990, þá var honum slegið út að aftan og skipt um brú 1990. Hann mælist 151 brl./255 BT að stærð. Aðalvél 775 hestafla Caterpillar frá 1998. Upphaflega var hann 105 brl. að stærð.

1202. Langanes GK 525 ex Grundfirðingur SH 12. Ljósmynd Elvar Jósefsson 2020.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Sigurjón Arnlaugsson HF 210

167. Sigurjón Arnlaugsson HF 210 ex Hafnarnes RE 300. Ljósmynd Hafþór Hreiðarsson.

Þarna virðist komið að endalokum hjá Sigurjóni Arnlaugssyni HF 210 sem upphaflega hét Pétur Sigurðsson RE 331.

Pétur Sigurðsson RE 331 var smíðaður í Noregi árið 1960 og kom til landsins þá um sumarið. Eigandi Sigurður Pétursson í Reykjavík sem átti bátinn til ársins 1968 en í júní það ár var hann seldur til Grundarfjarðar.

Þar fékk hann nafnið Ásgeir Kristjánsson SH 235 og var í eigu Guðmundar Runólfssonar og Björns Ásgeirssonar. í Ársbyrjun 1974 kaupir Þorvaldur Jón Ottósson bátinn og nefnir Hafnarnes RE 300.

Í ágústmánuði 1979 kaupir Hleiðra h/f í Hafnarfirði bátinn og nefnir Sigurjón Arnlaugsson HF 210.

Upphaflega mældist báturinn 140 brl. að stærð en var endurmældur árið 1974 og mældist þá 119 brl. að stærð. Árið 1983 var sett í bátinn 700 hestafla Cummins aðalvél í stað 350 hestafla Wichmann sem hafði verið í honum frá upphafi. Heimild Íslensk skip.

Sigurjón Arnlaugsson HF 210 var afskráður árið 1990. Honum var sökkt á Kollafirði það sama ár en þar er flakið notað sem æfingarstöð fyrir kafara. 

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Guðmundur Kristinn SU 404

1000. Guðmundur Kristinn SU 404 ex Flosi ÍS 15. Ljósmynd Þorgeir Baldursson.

Guðmundur Kristinn SU 404, sem sést hér á mynd Þorgeirs Baldurssonar, var mikið aflaskip sem gert var út frá Fáskrúðsfirði um árabil.

Guðmundur Kristinn SU 404 hét áður Flosi ÍS 15 en upphaflega hét hann Seley SU 10 og var frá Eskifirði. Smíðaður í Flekkefjørd árið 1966.

Í marsmánuði það ár mátti m.a lesa eftirfarandi um Seley SU 10 í Austurlandi:

Um síðustu helgi kom til Eskifjarðar nýtt og glæsilegt fiskiskip, Seley SU 10, eign Kristmanns Jónssonar útgerðarmanns, annað skip hans með þessu nafni.

Seley er 285 lestir að stærð, og er því stærsta skipið í flota Eskfirðinga. Skipið, sem er stálskip, er smíðað í Flekkefjord í Noregi og búið 660 ha. Lister Blackstone-vél. Ganghraði reyndist 11 sjómílur.

Seley SU 10 var seld Græði h/f í Bolungarvík í árslok 1972 og fékk nafnið Flosi ÍS 15. Skipið var endurmælt árið 1973 og mældist þá 229 brl. að stærð.

Í desember 1976 kaupa Pólarsíld h/f á Fáskrúðsfirði og Magnús Þorvaldsson á Stöðvarfirði Flosa ÍS 15 og nefna Guðmund Kristinn SU 404. 1979 var skráður eigandi Pólarsíld h/f á Fáskrúðsfirði. (Heimild Íslensk skip)

Guðmundur Kristinn SU 404 var gerður út frá Fáskrúðsfirði eitthvað fram yfir 1990. Eftir að hafa legið í Reykjavík um tíma fékk hann nafnið Kristján RE 110 árið 1998 og fljótlega eftir það sitt síðasta nafn á Íslenskri skipaskrá, Eldhamar GK 13.

Eldhamar GK 13 var seldur til Króatíu árið 2007 þar sem hann fékk nafnið Bibe og er notaður í ferðaþjónustu.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Gissur Hvíti SF 55 á toginu

964. Gissur Hvíti SF 55 ex Bára GK 24. Ljósmynd Hafþór Hreiðarsson.

Gissur Hvíti Ff 55 frá Hornafirði er hér að rækjuveiðum norðan við land en myndina tók Hreiðar Olgeirsson skipstjóri á Kristbjörgu ÞH 44.

Upphaflega hét báturinn Bára SU 526 frá Fáskrúðsfirði og var í eigu Árna Stefánssonar. Síðar var hann seldur 1972 Garðari Magnússyni í Ytri-Njarðvík og varð báturinn, sem smíðaður er Þrándheimi í Noregi 1964, þá Bára GK 24. 

Silfurnes hf. á Hornafirði keypti bátinn 1978 og fékk hann nafnið Gissur Hvíti SF 55. Það var svo í nóvember 1985 sem Særún hf. á Blönduósi keypti bátinn sem varð Gissur Hvíti HU 35 og var gerður út til rækjuveiða. 

Gissur Hvíti HU 35 var seldur til Vestmannaeyja eftir aldamótin síðustu, árið 2002 nánar tiltekið. Bergur-Huginn keypti hann en seldi svo Narfa hf. bátinn sem fékk þá nafnið Narfi VE 108. 

Upphaflega var í bátnum 450 hestafla Stork aðalvél enn 1983 var sett ný vél í hann, 800 hestafla Callesen. Báturinn mældist upphaflega 216 brl. að stærð en var 1973 og mældist þá 165 brl. að stærð. Hann var yfirbyggður á Akureyri 1989 og þó nokkrum árum síðar var skipt um brú.

Það var síðan árið 2008 sem Oddur Sæmundsson í Keflavík keypti bátinn og nefndi Stafnes KE 130. 

Stafnes KE 130 hefur verið afskráð af skipaskrá.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Naustavík EA 151

1417. Naustavík EA 151 ex Sólrún EA 151. Ljósmynd Hafþór Hreiðarsson.

Naustavík EA 151 hét upphaflega Sólrún EA 251 og var smíðuð í Skipasmíðastöð KEA árið 1975.

Báturinn var smíðaður fyrir Sólrúnu h/f á Litla-Árskógssandi og eftir að hafa átt bátinn í tæpa þrjá mánuði breyttu eigendurnir númerum í EA 151. Sólrún var síðasti báturinn sem var smíðaður hjá Skipasmíðastöð KEA.

Sólrún EA var 28 brl. og er því báturinn er enn í fullu fjöri sem hvalaskoðunarbátur á Húsavík. Hann var búinn 300 hestafla Volvo-Penta aðalvél.

Árið 1984 var sett í bátinn 300 hestafla Mitsubishi aðalvél.

Í janúar 1987 er báturinn seldur Naustavík s/f á Árskógssandi og fær þá nafnið Naustavík EA 151. Sumarið 1999 keypti Fiskkaup h/f bátinn og nefndi Ásrúnu RE 277. Ári síðar kaupir Ingimundur h/f Ásrúnu og nefnir Helgu RE 47. Sumarið 2002 fékk báturinn nafnið Breiðdælingur SU 62 og var eigandi Fossabrún ehf. á Breiðdalsvík.

Norðursigling ehf. á Húsavík keypti bátinn haustið 2002 og sumarið 2003 hóf hann siglingar með ferðamenn undir nafninu Bjössi Sör.

Ný Mitsubishi aðalvél var sett í bátinn árið 2018 og er hún 310 hestöfl.

1417. Naustavík EA 151 ex Sólrún EA 151. Ljósmynd Hafþór Hreiðarsson.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Þinganes og Steinunn

2966. Steinunn SF 10 – 2970. Þinganes SF 25. Ljósmynd Magnús Jónsson 2020.

Það styttist í að Hornafjarðarskipin Þinganes SF 25 og Steinunn SF 10 haldi til veiða en þessa mynd tók Maggi Jóns af þeim í Hafnarfjarðarhöfn í dag.

Þinganes SF 25 og Steinunn SF 10 eru í hópi sjö systurskipa sem norska skipasmíðastöðin VARD smíðaði fyrir íslenskar útgerðir. Þinganes og Steinunn voru smíðuð í Víetnam en fullkláruð í Noregi.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Hrafn Sveinbjarnarson GK 255

1028. Hrafn Sveinbjarnarsonn GK 255. Ljósmynd Hafþór Hreiðarsson.

Hrafn Sveinbjarnarson GK 255 var smíðaður árið 1967 fyrir Þorbjörn hf. í Grindavík. Einn 18 báta sem smíðaðir voru í skipasmíðastöðinni V.e.b Elbewerft í Boizenburg í Austur Þýskalandi. 

Í 4 tbl. Faxa sem kom út 4. apríl 1967 sagði svo frá komu bátsins til landsins:

Á skírdag kom til Grindavíkur nýr bátur smíðaður í Austur-Þýzkalandi. Hann heitir Hrafn Sveinbjarnarson GK 225 og er hann 270 tonn að stærð. Eigandi er Þorbjörn h.f., Grindavík.

Mb. Hrafn Sveinbjarnarson er þriðji bátur Þorbjarnar h.f. og bera þeir allir sama nafn.

Báturinn er smíðaður í Austur-Þýzkalandi og hófst smíði hans fyrir tæpu ári. Hann er búin öllum nýjustu og fullkomnustu siglingar- og fiskleitartækjum. Aðalvél er af gerðinni Listar-Blackstone, 660 hestöfl. Auk þess eru tvær hjálparvélar af sömu gerð.

Fárviðri hreppti báturinn á hafinu alla leið til Grindavíkur að undanskildum síðasta sólarhringnum. Reyndist Hrafn Sveinbjarnarson að dómi allra skipverja afburða gott sjóskip.

Skipstjóri er Pétur Sæmundsson frá Keflavík, ungur maður en þekkt aflakló. 1 vélstjóri er Valdimar Valdimarsson og stýrimaður Hreinn Sveinsson.

Hrafn Sveinbjarnarson er þegar búinn að fara í tvo róðra með net og var aflinn rúm 12 tonn í fyrsta róðri og 10 tonn í þeim síðari.

Báturinn kostaði á fimmtándu milljón króna.

Svo mörg voru þau orð en eins og áður segir voru þeir 18 bátarnir sem smíðaðir voru í Boizenburg fyrir Íslendinga á árunum 1965-1967. Hrafn Sveinbjarnarson GK 255 er annar tveggja sem eftir eru og enn í drift. Hann heitir í dag Saxhamar SH 50. Hinn er Kristín GK 457 sem upphaflega hét Þorsteinn RE 303.

Árið 1987 fór Hrafn Sveinbjarnarson GK 255 í miklar endurbætur í Skagen í Danmörku en áður hafði hann verið yfirbyggður. Breytingarnar voru helstar útlitslega að báturinn var lengdur um 4 metra og yfirbyggður, settur var á hann bakki og nýr afturendi, ný brú, ásamt íbúðum undir henni. 

Árið 1991 var sett á hann pera. Árið 2005 var skipt um aðalvélina. Aðalvél skipsins er frá Caterpillar og er 862 hestöfl að stærð eða um 643 kW að stærð.

Skráð lengd skipsins í dag er 36,1 metrar en mesta lengd er 39,46 metrar og breiddin 7,20 metrar. Skipið mælist 256 brl./393,59 brúttótonn að stærð.

Síðar hét báturinn Sigurður Þorleifsson GK 10, því næst Sæljón SU 104, þá Sjöfn ÞH 142 og síðan Sjöfn EA 142 og loks Saxhamar SH 50.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Freyja GK 364

923. Freyja GK 364 ex Kolbrún ÍS 74. Ljósmynd Hafþór Hreiðarsson.

Séníverinn var eitt sinn gulur og hét Freyja GK 364 með heimahöfn í Garðinum. Eigandi Halldór Þórðarson sem gjarnan var nefndur Dóri á Freyjunni.

Báturinn var smíðaður árið 1957 í Danmörku fyrir Sigvalda Þorleifsson h/f í Ólafsfirði og hét Þorleifur Rögnvaldsson ÓF 36. Báturinn var endurbyggður frá grunni hjá Skipasmíðastöð Njarðvíkur og lauk þeirri vinnu árið 1985 en stöðin hafði átt bátinn frá árinu 1974.

Hér má lesa nánar um það hvaða nöfn báturinn hefur borið í gegnum tíðina.

Eins og kunnugt er lenti hann í snjóflóðinu á Flateyri í janúar sl. og liggur að ég best veit hálfsokkin þar enn. En vonandi verður honum bjargað.

Samkvæmt vef Fiskistofu fékk báturinn nafnið Freyja GK 364 í marsmánuði 1995 og bar það til sumarsins 2000. Þá fékk báturinn nafnið Röstin GK 120 en árið 2010 fékk hann Orranafnið sem hann ber í dag.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Ófeigur VE 324

1179. Ófeigur VE 324 ex Árni í Görðum VE 73. Ljósmynd Hreiðar Olgeirsson.

Reknetabáturinn Ófeigur VE 324 er hér að koma að bryggju á Vopnafirði, held ég. Myndina tók Hreiðar Olgeirsson skipstjóri á Kristbjörgu ÞH 44.

Upphaflega hét báturinn Árni í Görðum VE 73 og var smíðaður fyrir Einar Guðmundsson h/f hjá Þorgeir & Ellert h/f á Akranesi. Hann var 103 brl. að stærð búinn 500 hestafla Alpha aðalvél.

Haustið 1983 er Árni í Görðum VE 73 seldur innanbæjar í Vestmannaeyjum og fær nafnið Ófeigur VE 324.

Árið 1989 var Ófeigur VE 324 seldur norður á Blönduós þar sem hann fékk nafnið Ingimundur gamli HU 65.

Ingimundur gamli HU 65 sökk sunnudaginn 8. október 2000 þar sem hann var að rækjuveiðum. Sæbjörg ST 7 bjargaði tveim úr áhöfn bátsins, sem þá var gerður út frá Hvammstanga, en skipstjórinn fórst með bátnum.

Með því að smella á myndina er hægt að skoða hana í hærri upplausn.

By clicking on the images you can view them in higher resolution