256. Kristrún RE 177 ex Albert Ólafsson KE 39. Ljósmynd Valdimar Halldórsson.
Hér kemur línubáturinn Kristrún RE 177 að landi í Reykjavík á fyrri hluta tíunda áratug síðustu aldar, ef ég man rétt en myndina tók Valdimar Halldórsson.
2758. Dala-Rafn VE 508. Ljósmynd Hólmgeir Austfjörð 2020.
Dala-Rafn VE 508, togbátur Ísfélagsins í Vestmannaeyjum, hélt til veiða í dag og náði Hólmgeir Austfjörð þessum myndum af honum þá.
Dala Rafn VE 508 var smíðaður í Póllandi árið 2007 fyrir samnefnt útgerðarfélag. Þá var hann grænn en Ísfélag Vestmannaeyja keypti Dala-Rafn 2014 og með tímanum varð hann rauður.
2758. Dala-Rafn VE 508. Ljósmyndir Hólmgeir Austfjörð 2020.
Með því að smella á myndirnar er hægt að skoða þær í hærri upplausn.
By clicking on the images you can view them in higher resolution
IMO:9690688.Mark ROS 777. Ljósmynd Eiríkur Sigurðsson 2020.
Eiríkur Sigurðsson skipstjóri á Reval Viking tók þessa mynd af þýska togaranum Mark ROS 777 í morgun.
Togarinn var að veiðum norður af Nordkap en Reval Viking á stími inn til Tromsø eftir rækjuveiðar í Smugunni.
Togarinn, sem er 84 metra langur og 16 metra breiður, var smíðað í Tersan skipasmíðastöðinni í Tyrklandi og afhent eigandanum, Parlevliet & Van der Plas group í júní 2015. Heimahöfn hans er í Rostock.
Með því að smella á myndina er hægt að skoða hana í hærri upplausn.
By clicking on the images you can view them in higher resolution.
Trudovaya Slava heitir þetta 12,487 brúttótonna skip sem pabbi myndaði þegar hann var á Dagfara ÞH 70 við síldveiðar norður í höfum. 1968 eða þar um bil.
Þetta skip var byggt í Kiel í Vestur-Þýskalandi árið 1965 og var einhversskonar verksmiðjuskip. Þarna má sjá síldartunnur og því má ætla að það hafi verið að salta síld þegar þetta var. Eða m.a átt að gera það, lítið var um síld þegar þarna var komið.
93. Brynjólfur ÁR 3 ex Nói EA 477. Ljósmynd Þorgeir Baldursson 1995.
Þorgeir Baldursson tók þessa mynd um árið þegar Brynjólfur ÁR 3 var búinn í slipp á Akureyri en Meitillinn hf. í Þorláksshöfn keypti hann af Samherja haustið 1995.
Upphaflega hét báturinn Helgi Flóventsson ÞH 77 og var smíðaður fyrir Svan h/f á Húsavík í Risör í Noregi árið 1962.
Helgi Fló var seldur frá Húsavík árið 1971 og kaupandinn var Þórður Óskarsson h/f á Akranes sem gaf honum nafnið Sólfari AK 170.
Sólfari AK 170 skemmdist mikið þegar eldur kom upp í honum árið 1973. Þá var báturinn að veiðum fyrir sunnan land og dró strandferðaskipið Esja hann til Njarðvíkur.
Eftir endurbyggingu á bátnum en hann var mikið skemmdur, sjá hér, fékk hann nafnið Skjaldborg RE 40. Árið 1977 er hann kominn til Eyja sem Stígandi VE 77 og 1979 er hann seldur Þorbirninum h/f í Grindavík.
Þar fær hann nafnið Hrafn Sveinbjarnarson II GK 10 og er yfirbyggður árið 1982. Báturinn fór til Danmerkur í breytingar árið 1986 þar sem hann var m.a lengdur um fimm metra.
Árið 1988 er báturinn seldur til Eyrarbakka þar sem hann fékk nafnið Særún ÁR 400 og 1990 fær hann nafnið Náttfari HF 185.
Árið 1992 er Náttfari HF 185 seldur norður á Dalvík þar sem hann fær síðan nafnið Nói EA 477 og þrem árum síðar kaupir Meitillinn h/f hann suður aftur. Og þar fær hann nafnið sem hann ber á myndinni.
Brynjólfur ÁR 3 var gerður út frá Vestmannaeyjum eftir sameiningu Vinnslustöðvarinnar og Meitilsins og árið 2005 var komið að endalokum hans. Báturinn fór í brotajárn til Danmerkur það ár.
Með því að smella á myndina er hægt að skoða hana í hærri upplausn.
By clicking on the images you can view them in higher resolution.
