Dagur: 21. mars, 2020

Bjarni og Árni við Háabakka

2350. Árni Friðriksson RE 200 kemur að bryggju í morgun. Ljósmynd Magnús Jónsson.

Hafrannsóknarskipið Árni Friðriksson RE 200 kom til Hafnarfjarðar í morgun og lagðist að Háabakka við Fornubúðir.

Við Hábakka lá fyrir Bjarni Sæmundsson RE 30 en hann kom til hafnar í gærkveldi en bæði skipin voru að koma úr hinu árlega marsralli Hafrannsóknarstofnunar.

Þetta er í fyrsta skipti sem skipin liggja bæði við Háabakka en nýja höfuðstöðvar Hafró eru í Fornubúðum 5 upp af Háabakka.

Hafrannsóknarskipin við Háabakka í morgun. Ljósmynd Magnús Jónsson.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Álaborg ÁR 25

1359. Álaborg ÁR 25 ex Sólborg SH 207. Ljósmynd Hafþór Hreiðarsson 2005.

Nú birtast nokkar myndir af vertíðarbátnum Álaborg ÁR 25 koma til hafnar í Þorlákshöfn á vetrarvertíðinni árið 2005. Nánar tiltekið þann 3. mars.

Það var Fiskisver ehf. sem gerði Álaborg út en hún var með heimahöfn á Eyrarbakka.

Báturinn var smíðaður á Ísfirði árið 1974 og hét upphaflega Sturlaugur II ÁR 7. Hann var 138 brl. að stærð, búinn 750 hestafla caterpillar aðalvél.

Árið 1975 var báturinn seldur austur á Fáskrúðsfjörð þaðan sem hann var gerður út í tuttugu ár undir nafninu Sólborg SU 202. Sólborg var yfirbyggð árið 1985.

Árið 1995 varð Sólborg, samkvæmt vef Fiskistofu, RE 270 og ári síðar SH 207. Það sama ár, 1996, var báturinn seldur Fiskiveri.

Snemma árs 2007 kaupir Bergur-Huginn í Vestmannaeyjum Álaborgina og selur hana síðan til Hollands um mitt sumar.

1359. Álaborg ÁR 25 ex Sólborg SH 207. Ljósmyndir Hafþór Hreiðarsson 2005.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution