Haukur Böðvarsson ÍS 847

1686. Haukur Böðvarsson ÍS 847. Ljósmynd Hafþór Hreiðarsson.

Haukur Böðvarsson ÍS 847 var smíðaður í Skipasmiðjunni Herði hf. í Njarðvík og afhent þaðan í janúarmánuði 1985.

Báturinn, sem var 57 brl. að stærð og með smíðanúmer 2 frá stöðinni, var smíðaður fyrir Þorstein hf. á Ísafirði.

Vorið 1990 fékk báturinn nafnið Gullþór KE 70 sem hann bar ekki lengi því rétt fyrir jólin sama ár keypti Snorri Snorrason á Dalvík bátinn. Fékk hann nafnið Kristján Þór EA 701.

Það var svo vorið 1992 að báturinn fékk nafnið Gunnbjörn ÍS 302 eftir að hafa verið seldur til Bolungarvíkur.

1686. Haukur Böðvarsson ÍS 847. Ljósmynd Hreiðar Olgeirsson.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Sæborg ÞH 55

1475. Sæborg ÞH 55. Ljósmynd Hafþór Hreiðarsson.

Sæborg ÞH 55 var smíðuð fyrir Húsvíkinga á Bátaverkstæði Gunnlaugs og Trausta á Akureyri árið 1977.

Í Tímanum 4. mars 1977 sagði svo frá:

Síðastliðinn laugardag afhenti bátaverkstæði Gunnlaugs og Trausta á Akureyri nýjan eikarbát 40 lestir að stærð og hlaut hann nafnið Sæborg ÞH-55. Báturinn var smíðaður fyrir Húsvíkingana Karl Aðalsteinsson og syni hans Aðalstein og Óskar.

Sæborg er búin öllum fullkomnustu tækjum m.a. til neta- nóta- línu- og togveiða. Sæborg hefur þegar hafið veiðar og reynist vel.

Bátinn teiknaði Tryggvi Gunnarsson skipasmíðameistari. Sæborg er tíundi báturinn, sem bátaverkstæði Gunnlaugs og Trausta smíðar og jafnframt þeirra stærstur. Á bátaverkstæðinu eru sex fastráðnir starfsmenn auk fleiri sem vinna þar öðru hverju.

Að sögn forráðamanna bátaverkstæðisins er nú ekkert nýsmíðaverkefni framundan hjá þeim við bátasmíðarnar, þannig að óvist er hvað við tekur hjá fyrirtækinu.

Sæborg ÞH 55 var seld til Keflavíkur árið 1991 þar sem báturinn fékk nafnið Eyvindur KE 37. Árið 2000 verða eigendaskipti á bátnum, Árni Jónsson ehf. kaupir hann af Eyvindi ehf. og við það fékk hann KE 99 í stað KE 37.

Árið 2002 kaupir Hraunútgerðin ehf. bátinn aftur til Húsavíkur og fær hann sitt gamla nafn, Sæborg ÞH 55.

Sæborg var seld vorið 2009 til Bolungarvíkur þar sem báturinn fékk nafnið Gunnar Halldórs ÍS 45. Árið 2014 fékk hann nafnið Áróra eftir að hafa verið gerður upp til farþegasiglinga.

Vorið 2016 kaupir Norðursigling bátinn aftur til Húsavíkur og enn fær hann sitt upphaflega nafn, Sæborg, sem hann ber í dag.

Með því að smella á myndina er hægt að skoða hana í hærri upplausn.

By clicking on the images you can view them in higher resolution.