Bolli KE 46

1248. Bolli KE 46 ex Vörðufell KE 117. Ljósmynd Hafþór Hreiðarsson.

Bolli KE 46, sem hér sést við bryggju á Suðurnesjunum, var smíðaður árið 1972 hjá Skipasmíðastöð Austfjarða hf. á Seyðisfirði.

Hann hét upphaflega Kristín NK 17, var 12 brl. að stærð búinn 126 hestafla Volvo Penta vél.

Báturinn fékk nafnið Bliki SU 108 þegar hann var seldur á Eskifjörð árið 1974. Árið 1985 fær hann nafnið Vörðufell HF 1 og heimahöfnin Hafnarfjörður.

Vörðufellið var selt í Garðinn í byrjun árs 1986 og heldur nafninu en varð KE 117. Í febrúar 1988 var báturinn seldur til Keflavíkur þar sem hann fékk það nafn sem hann ber á myndinni, Bolli KE 46.

Það nafn bar hann til haustsins 1992 þegar hann var tekinn af skipaskrá þá í eigu þeirra sem stóðu að útgerð Arneyjar KE 50.

En saga bátsins var ekki öll þarna því Lárus Ingi Lárusson, búsettur í Noregi, keypti bátinn. Hann nefndi hann Oddbjörgu og sigldi henni út og hugðist gera úr henni skemmtibát. Heimild Víkurfréttir

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Þráinn ÞH 2

5357. Þráinn ÞH 2 ex Leiknir SI 33. Ljósmynd Hafþór Hreiðarsson.

Þarna koma þeir að um árið bræðurnir Pálmi og Benedikt Héðinssynir á trillu sinni Þráni ÞH 2 sem smíðuð var á Siglufirði árið 1972.

Þráinn ÞH 2 var 5,15 brl. að stærð, smíðaður af Kristjáni Sigurðssyni á Siglufirði og hét upphaflega Þórleif EA 56. Eigandi Valdimar Traustason í Grímsey.

Þeir bræður kaupa bátinn frá Siglufirði árið 1980 en þar hafði hann verið í tvö ár undir nafninu Leiknir SI 33.

Þráinn ÞH 2 var afskráður vorið 2000 og gáfu bræðurnir bátinn og fylgihluti hans til Sjóminjasafnsins á Húsavík. Þar er hann enn en ástand hans ekki gott.

Með því að smella á myndina er hægt að skoða hana í hærri upplausn.

By clicking on the images you can view them in higher resolution