Grindvíkingur GK 606

1512. Grindvíkingur GK 606. Ljósmynd Hreiðar Olgeirsson.

Grindvíkingur GK 606 er á þessari mynd Hreiðars Olgeirssonar frá því haustið 1982- eða 3.

Í 8. tbl. Ægis árið 1978 sagði m.a um Grindvíking GK 606:

30. maí s.l. bættist nýtt nótaveiðiskip við flota landsmanna, m/s Grindvíkingur GK-606, sem þá kom til heimahafnar sinnar, Grindavíkur, í fyrsta sinn.

Skip þetta er smíðanúmer 137 hjá Fartygsentreprenander AB í Uddevalla í Svíþjóð, sem sá um smíðina. Smíði skipsins var hins vegar með þeim hætti að smíði á skipsskrokk og yfirbyggingu fór fram í Svíþjóð hjá Karlstadverken, en síðan var skipið dregið til Danmerkur þar sem smíðinni var lokið, þ.e. smíði innréttinga, niðursetning á véla- og tækjabúnaði og annar frágangur. Það var skipasmíðastöðin 0rskovs Staalskipsværft í Fredrikshavn, sem annaðist þennan verkþátt, sem ber númer 104 hjá stöðinni. 

Grindvikingur GK er byggður eftir sömu teikningu og hjá sömu aðilum og m/s Bjarni Ólafsson AK, sem kom í byrjun þessa árs (sjá 5. tbl- Ægis 1978).

Ýmsar breytingar hafa verið gerðar frá Bjarna Ólafssyni m.a. á fyrir- komulagi í þilfarshúsi á efra þilfari, bætt við svefnklefa; lestarfyrirkomulagi á milliþilffari breytt o.fl.

Af véla- og tækjabúnaði sem er umfram og breyttur má nefna: aflmeiri aðalvél, aflmeiri hliðarskrúfur, ferskvatnsframleiðslutæki, ísvél, einn losunarkrani umfram, tvær slöngutromlur, gervitunglamóttakari og myndtalva fyrir asdik, auk þess gyroáttaviti í stað seguláttavita. Andveltigeymar eru ekki í Grindvíkingi en slíkir geymar eru í Bjarna Ólafssyni. 

Í skipinu eru tvö ný tæki, sem ekki hafa áður verið sett í íslenzkt fiskiskip, en það eru gervitunglamóttakari frá Simrad og vegmælir frá Simrad. 

Eigandi Grindvíkings GK er Fiskanes h.f. í Grindavík. Skipstjórar á Grindvíkingi eru Björgvin Gunnarsson og Willard Ólason og 1. vélstjóri Sveinn Kristinsson. Framkvæmdastjóri útgerðarinnar er Dagbjartur Einarsson. 

Þegar nýr Grindvíkingur GK 606 var keyptur frá Noregi sumarið 2003 fékk sá gamli nafnið Skarfur GK 666. Skarfur var seldur úr landi árið 2005.

Með því að smella á myndina er hægt að skoða hana í hærri upplausn.

Bjarni Ólafsson AK 70

1504. Bjarni Ólafsson AK 70. Ljósmynd Hreiðar Olgeirsson.

Þessa mynd af Bjarna Ólafssyni AK 70 tók Hreiðar Olgeirsson skipstjóri á Kristbjörgu ÞH 44 haustið 1982 eða 1983. Þá stundaði Kristbjörg síldveiðar með lagnet og landaði m.a á Vopnafirði.

Um Bjarna Ólafsson AK 70 sagði m.a í 4. tbl. Ægis árið 1978:

9. janúar s.l. bættist nýtt nótaveiðiskip við flota landsmanna, m/s Bjarni Ólafsson AK 70, sem þá kom til heimahafnar sinnar, Akraness, í fyrsta sinn.

Skip þetta er smíðanúmer 135 hjá Fartygsentreprenander AB í Uddevalla í Svíþjóð, sem sá um smíðina. Smíði skipsins var hins vegar með þeim hætti að smíði á skipsskrokk og yfirbyggingu fór fram í Svíþjóð hjá Karlstadverken, en síðan var skipið dregið til Danmerkur þar sem smíðinni var lokið, þ.e. smíði innréttinga, niðursetning á véla- og tækjabúnaði og annar frágangur.

Það var skipasmíðastöðin 0rskovs Staalskibs- værft í Frederikshavn, sem annaðist þennan verkþátt, sem ber númer 103 hjá stöðinni. 

Bjarni Ólafsson AK er stærsta nótaveiðiskip sem byggt hefur verið fyrir íslendinga, og innan skamms er væntanlegt til landsins annað skip af sömu gerð. Eigandi Bjarna Ólafssonar er Runólfur Hallfreðsson og er hann jafnframt skipstjóri á skipinu, en 1. vélstjóri er Þráinn Sigurðsson.

Bjarni Ólafsson AK 70 var 53,78 metr­ar á lengd og 9,50 metr­a á breidd og mæld­ist 556 brúttó­rúm­lest­ir eða 729 brútt­ót­onn.

Þegar nýr Bjarni Ólafsson AK 70 kom til landsins árið 1997 keypti Skálar hf. á Þórshöfn þann gamla og nefndi Neptúnus ÞH 360.

Gjögur hf. keypti Neptúnus ÞH 360 haustið 2003 með einhverjum aflaheimildum og í kjölfarið var skipið selt erlendis í brotajárn.

Með því að smella á myndina er hægt að skoða hana í hærri upplausn.