Indriði Kristins BA 751

2907. Indriði Kristins BA 751. Ljósmynd Jón Steinar.

Jón Steinar tók þessa mynd af Indriða Kristins BA 751 í ölduróti þar sem hann var að koma til hafnar í Grindavík

Indriði þessi hefur nú verið leystur af hólmi með nýrri og stærri Cleópötru sem fékk sama nafn en þessi var seldur til Suðureyrar þar sem hann fék nafnið Einar Guðnason ÍS 303.

Með því að smella á myndina er hægt að skoða hana í stærri upplausn.

Aðalsteinn Jónsson SU 11

2929. Aðalsteinn Jónsson SU 11 ex Libas. Ljósmynd Þorsteinn Eyfjörð Friðriksson 2018.

Aðalsteinn Jónsson SU 11 er hér með nótina úti á síðustu loðnuvertíð en myndina tók frændi minn Þorsteinn Eyfjörð skipverji á Hákonui EA 250 frá Grenivík.

Aðalsteinn Jónsson hét áður Libas og smíðaður árið 2004, hann er 94 metrar að lengd og tæpir 18 metrar á breidd.

Skipið var smíðað í Fitjar Mek. Verksted í Noregi og er geysilega vel útbúið til veiða en skipið er einnig hannað til hafrannsókna og þjónustu við olíuleit.

Aðalvél skipsins er Wartsila 12V32, 6000 kw eða 8100 hestöfl og burðargeta er um 2400 m3 í 12 kælitönkum.

Með því að smella á myndina er hægt að skoða hana í stærri upplausn.

Iða við bryggju á vetrarkveldi

1432. Iða ÞH 321 ex Von ÞH 54. Ljósmynd Hafþór Hreiðarsson 2018.

Þessa mynd af Iðu ÞH 321 tók ég sl. sunnudagskvöld þegar rofaði til eftir norðanhríð síðustu daga.

Iða hét áður Von ÞH 54 og var smíðuð í Neskaupstað árið 1975. Báturinn er  6 brl. að stærð og hét upphaflega Þórey NK 13.  Síðan Þórey ÞH 11 frá Þórshöfn á Langanesi og því næst Vilborg ÞH 11 frá Húsavík.

Sigurður Kristjánsson á Húsavík eignaðist síðan bátinn vorið 1991 og nefndi Von ÞH 54. Vonina gerði hann út til ársins 2016 er hann keypti Guðný NS 7 og nefndi Ósk ÞH 54.

Eigandi Iðu ÞH 321 er Galti ehf. á Húsavík.

Með því að smella á myndina er hægt að skoða hana í stærri upplausn.