Ilivileq kom til Reykjavíkur í dag

IMO: 9830434. Ilivileq GR 2-201 við komuna til Reykjavíkur í dag. Ljósmynd Magnús Jónsson.

Frystitogarinn Ilivileq GR 2-201, sem er í eigu dótturfélags Brims á Grænlandi, kom til hafnar í Reykjavík í hádeginu í dag. Magnús Jónsson tók þessar myndir við komuna.

Togarinn var smíðaður í spænsku skipasmíðastöðinni Astilleros Armon Gijon á Norður-Spáni. 

Á vef Fiskifrétta segir m.a svo frá komu hans:

Beðið hefur verið eftir skipinu með mikilli eftirvæntingu. Skipið er eitt það fullkomnasta í Norður-Atlantshafi. Rolls Royce í Noregi hannaði skipið í samstarfi við Brim sem smíðað var á Norður-Spáni.

Frystitogarinn er 81,8 metrar að lengd, 17 metra breiður og um 5000 brúttótonn að stærð. Við hönnun skipsins var orkusparnaður hafður að leiðarljósi, sem og sjálfvirkni. Aðstaða sjómanna er til fyrirmyndar og fullkomnasti búnaður til flökunar og frystingar er bæði byltingarkenndur fyrir vinnuaðstöðuna um borð og margfaldar framleiðslugetuna.

Þá er fiskimjölsverksmiðja í skipinu fyrir það sem fellur til við flakavinnsluna. Allur afli verður því fullnýttur og afkastageta vinnslunnar getur verið allt að 150 tonn á sólarhring. Í frystilestum verður rými fyrir allt að 1000 tonn af afurðum, flokkuðum á brettum.

Skipið er búið nýrri kynslóð af vélum frá Bergen-Diesel og Rolls-Royce með 5400 kW afli. Um borð er öflugt rafvindukerfi þar sem rafmagn fyrir vindurnar og annan búnað er framleitt með ásrafali.

Vinnsludekkið kemur frá Danmörku og flökunarvélarnar frá Vélfagi á Ólafsfirði.

Samspilið í hönnuninni gerir það að verkum að öll stýring vinnsluferla í skipinu er mun nákvæmari en nokkru sinni fyrr.

Skipið hóf heimferð fyrir fimm dögum frá Spáni með Páli Þóri Rúnarssyni skipstjóra og Guðmundi Kristjáni Guðmundssyni stýrimanni í fararbroddi.

Skipið, sem fékk nafnið Ilivileq, er í eigu dótturfélags Brims á Grænlandi sem er í 100% eigu Brims.

Með því að smella á myndina er hægt að skoða hana í hærri upplausn.

By clicking on the images you can view them in higher resolution