Kópur ÞH 114

1099. Kópur ÞH 114. Ljósmynd Reynir Jónasson Húsavík.

Kópur ÞH 114 liggur hér við bryggju á Húsavík og hygg ég að myndin hafi verið tekin þegar báturinn kom nýr til Húsavíkur.

Kópur, sem var 12 brl. að stærð og smíðaður í Skipasmíðastöð KEA, var afhentur eiganda sínum Gesti Halldórssyni á Húsavík skömmu fyrir páska árið 1970. Hann var með smíðanúmer 102 hjá stöðinni og teiknaður af Tryggva Gunnarssyni.

Kópur ÞH 114 var með 159 hestafla Perkinsvél og kraftblökk að því fram kemur í Degi þann 2. apríl 1970.

Í ársbyrjun 1971 kaupa Hörður Arnórsson og bræðurnir Guðjón og Kristján Björnssynir bátinn af Gesti og nefna Þengil ÞH 114.

Þeir gera bátinn út til ársins 1977 en þá hafa þeir bátaskipti við Skúla Magnússon í Grindavík og Þengill fær nafnið Pétursey GK 184. 

Skiptin fara fram í maí 1977 en  þann 15. september sama ár strandaði báturinn við Grindavík. Báturinn eyðilagðist en maður sem var einn um borð bjargaðist með hjálp björgunarsveitarinnar Þorbjörns.  Uppl. Íslensk skip.

1099. Kópur ÞH 114. Ljósmynd Reynir Jónasson Húsavík.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Freyja ÞH 125

421. Freyja ÞH 125 ex Freyja KE 42. Ljósmynd Reynir Jónasson Húsavík.

Freyja ÞH 125, sem sést á þessum myndum Reynis Jónassonar á Húsavík, var smíðuð í Danmörku árið 1930.

Báturinn, sem var 23 brl. að stærð búinn 76 hestafla Tuxhamvél, hét upphaflega Sigurður Gunnarsson GK 525. Hann var smíðaður fyrir Guðmund Sigurðsson, Gunnar Sigurðsson og Friðrik Þorsteinsson í Keflavík.

Í ársbyrjun 1935 var báturinn seldur til Reykjavíkur þar sem hann fékk nafnið Freyja RE 225. Freyja átti eftir að verða GK 275, SH 140, BA 272, RE 307 og KE 42 áður en hún var keypt til Húsavíkur og varð ÞH 125.

Það gerðist síðla árs 1961 en þá keyptu bátinn þeir Guðjón Björnsson, Haukur Sigurjónsson, Hörður Arnórsson, Kristján Björnsson og Þorsteinn Jónsson.

1946 hafði verið sett í Freyju 90 hestafla June Munktellvél og 1960 var sett í hana 125 hestafla Penta dieselvél. 1967 var aftur skipt um vél og nú var það 240 hestafla GM dieslevél.

Freyja ÞH 125 var gerð út frá Húsavík til haustsins 1970 er hún var seld til Vestmannaeryja og varð Freyja VE 125. Í desember 1973 var Freyja seld til Ísafjarðar þar sem hún fékk nýtt nafn, Sigurður Þorkelsson ÍS 200.

Sigurður Þorkelsson ÍS 200 var talinn ónýtur og tekinn af skrá 25. október 1982 en fimm árum áður hafði verið sett í hann 240 hestafla Caterpillar dieselvél. Heimild Íslensk skip.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Reginn HF 228

647. Reginn HF 228 ex Helga Björg HU 7. Ljósmynd Hafþór Hreiðarsson.

Reginn HF 228, sem sést á þessum myndum koma til hafnar í Þorlákshöfn, hét upphaflega Kristján SH 6 og var smíðaður árið 1961 í Skipasmíðastöðinni hf. í Stykkishólmi. 

Á síðunni Bátasmíði.is segir um helgina að Kristján SH 6 sé nú kominn heim því Sigurjón Jónsson, stjórnarformaður Skipavíkur í Stykkishólmi, hafi ákveðið að koma að verndun bátsins og í framhaldinu afsalaði Kópavogsbær bátnum til Bátasafns Breiðafjarðar.

Fyrsta skrefið á þeirri braut verndunar er að báturinn var fluttur í lok janúar 2020 til Stykkishólms þar sem honum verður komið í geymslu og reynt að koma í veg fyrir frekari skemmdir á honum. 

Vonir standa til að báturin verði seinna endurbyggður í upprunalegri mynd og honum fundið hlutverk til framtíðar. Ýmsar myndir og gögn má finna hér:  http://batasmidi.is/photoalbums/292925/

Á síðunni segir svo frá bátnum en eins og áður kemur fram var hann smíðaður í Skipasmíðastöðinni hf. í Stykkishólmi:

Yfirsmiður var Kristján Guðmundsson (Stjáni Slipp) framkvæmdastjóri Skipasmíðastöðvarinnar. Þorsteinn Þorsteinsson skipasmíðameistari á Akureyri teiknaði bátinn. Báturinn er plankabyggður eikarbátur og þegar mælibréfið er gefið út í október 1961 er báturinn skráður  13,30 m. á lengd, 4,0 m. á breidd og 1,8 m. á dýpt og  20,90 brl. og vél Caterpillar 180 ha. 

Báturinn er afar vandaður vel viðaður og vel byggður og ber meisturum sínu fagurt vitni. Báturinn er heill og búið er að skoða hann og meta vel hæfan til viðgerðar.

Báturinn var smíðaður fyrir Gísla Kristjánsson og fleiri í Grundarfirði. Í febrúar árið 1965 kaupir Norðri hf í Flatey bátinn og er hann notaður sem flóa- og fiskibátur og fær nafnið Konráð BA 152 árið 1968. Árið 1972 er báturinn seldur til Skagastrandar og þá er sett á hann það hús sem enn er á honum. Þá fær hann nafnið Helga Björg HU 7. Báturinn var gerður út sem fiskibátur frá Skagaströnd.

Árið 1995 er báturinn seldur til Hafnarfjarðar og hlaut nafnið Reginn HF. Hann var síðan gerður út lengi frá Þorlákshöfn. Árið 2005 var hann skráður í Grundarfirði sem Sindri SH 121. Árið 2006 var hann skráður sem Gæskur KÓ. Síðan hefur báturinn ekki verið notaður og síðustu árin hefur hann staðið á landi og beðið örlaga sinna.

Sigurður Bergsveinsson sem ritar þetta hér að ofan sendi mér mynd af Kristjáni SH 6 tilbúnum til sjósetningar og birti ég hana í desember 2007. Spurning hvort ég finni hana og birti hér ef svo vel vill til.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution