Grande Argentina við festar á Tagus

Grande Argentina við festar á Tagus. Ljósmynd Hafþór Hreiðarsson 2019.

Bílaflutningaskipið Grande Argentina hefur legið við festar á ánni Tagus framundan Lissabon undanfarna daga.

Það er 214 metrar að lengd, 32 metrar á breidd og mælist 56.660 GT að stærð.

Skipið var smíðað árið 2001 og siglir undir flaggi Gíbraltar. Það er í eigu Grimaldi Lines.

Með því að smella á myndina er hægt að skoða hana í hærri upplausn.

By clicking on the images you can view them in higher resolution.

Þinganesið kom og fór

2040. Þinganes ÁR 25 ex Þinganes SF 25. Ljósmynd Jón Steinar 2019.

Þinganes ÁR 25 kom til Grindavíkur í gær og sett menn í land og beint út aftur.

Eitt fjögurra systurskipa sem smíðuð voru á sínum tíma fyrir Íslendinga hjá Carnave Eir Navais Sa smíðastöðinni í Aveiro í Portúgal.

2040. Þinganes ÁR 25 ex Þinganes SF 25. Ljósmynd Jón Steinar 2019.

Von er á nýju Þinganesi en hvað verður um þetta er ekki gott að segja.

2040. Þinganes ÁR 25 ex Þinganes SF 25. Ljósmynd Jón Steinar 2019.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Independence of the Seas leggst að bryggju í Lissabon

Independence of the Seas. Ljósmynd Hafþór Hreiðarsson 2019.

Farþegaskipið Independence of the Seas lagðist að bryggju um hádegisbil í Lissabon og stökk ég upp einar 2-3 hæðir til að ná því á mynd.

Skipið er í eigu Royal Caribbean cruise line sem fékk það afhent árið 2008 frá Turku shipyard í Finnlandi.

Það er 339 metrar að lengd, 38,6 metrar á breidd og tekur 5740 farþega en klefarnir eru 1817 talsins.

Áhöfnin telur 1360 manns sem hafa 763 klefa til umráða.

Annars má lesa nánar um skipið hér

Með því að smella á myndina er hægt að skoða hana í hærri upplausn.

By clicking on the images you can view them in higher resolution.

Hebridean Sky á Húsavík

Hebridean Sky við ex Sea Explorer I. Ljósmynd Gaukur Hjartarson 2019.

Hebridean Sky er eitt þeirra skemmtiferðaskipa sem koma til Húsavíkur í sumar og hafði það viðdvöl þar í gær.

Áki Hauksson skrifar á Fésbókarsíðu sína að þetta sé eitt af þremur systurskipum sem byggð voru á sama tíma. Það er útgerðarfélagið Noble Caledonia sem á skipið í dag en útgerðin keypti skipið árið 2014 og átti þá fyrir hin systurskip Hebridean Sky, þau Island Sky Caledonian Sky.

Systurskipin voru byggð af skipasmíðastöð Nuovi Cantieri Apuania á Ítalíu á svipuðum tíma en Hebridean Sky var tekið í notkun í Desember 1991. Skipið er 90,38 metra langt, 30 metra breitt og nær 14,5 mílna hraða og hefur verið gert út á suður-skautið aðallega í gegnum árin enda skipið byggt fyrir ís. Skipið getur tekið 120 farþega í 59 svítum um borð og lúxusinn um borð er ekki af verri endanum“. Skrifar Áki m.a um skipið.

Þess má geta að Caledonian Sky kom til Húsavíkur í júnímánuði 2011.

Með því að smella á myndina er hægt að skoða hana í hærri upplausn.

By clicking on the images you can view them in higher resolution.

Nýr skipstjóri á Hoffelli SU 80

2885. Hoffell SU 80 ex  Smaragd. Ljósmynd Óðinn Magnason 2019.

Sigurður Bjarnason hefur verið ráðinn skipstjóri á Hoffell SU 80 frá Fáskrúðsfirði. Hann tekur við starfinu af Bergi Einarssyni sem leitar nýrra ævintýra á öðru skipi.

Heimasíða Loðnuvinnslunnar tók viðtal við Sigga sem endurbirt er hér:

En hver er Sigurður Bjarnason? “Ég er Húsvíkingur” svaraði Sigurður, “fæddur og uppalinn þar, fyrir utan nokkur ár sem ég bjó á Þórshöfn sem barn”. Sigurður, eða Siggi eins og hann er gjarnan kallaður, hefur frá blautu barnsbeini verið viðloðandi sjómennsku og útgerð því að foreldrar hans áttu og ráku útgerð lengi vel.  

“Stefnan var snemma tekinn á sjóinn, það kom eiginlega aldrei neitt annað til greina” sagði Siggi þegar hann var inntur eftir því hvort að hann hefði ávallt verið sjómaður.  Hann tók fyrsta stig í Stýrimannaskólanum í Vestmannaeyjum en útskrifaðist svo úr Stýrimannaskólanum á Dalvík árið 1988.

“Ég flutti mig frá Vestmannaeyjum til Dalvíkur því að þá hafði ég kynnst konunni minni, Þóru Ragnheiði Aðalgeirsdóttur, og vildi gjarnan geta farið heim til Húsavíkur um hverja helgi” sagði Siggi brosandi og það hafa verið ferðir til fjár því að rúmum þremur áratugum síðar rugla þau enn saman reytum. 

Sigurður og Þóra Ragnheiður fluttu til Hafnarfjarðar árið 1999 og komu sér þar upp húsi og heimili og ólu þar upp börnin sín tvö.  Og nú eru barnabörnin orðin tvö.  

Eins og áður sagði áttu foreldrar Sigga útgerð sem hét Langanes og þar hófst sjómennska okkar manns.  Hann byrjaði sem háseti og vann sig upp í að verða skipstjóri á Björgu Jónsdóttur sem var í eigu Langaness, en til gamans má geta þess að skipin sem Langanes átti og nefnd voru Björg Jónsdóttir urðu alls sjö.

2618. Björg Jónsdóttir ÞH 321 ex Birkeland. Ljósmynd Hafþór Hreiðarsson 2004.

Útgerðin var svo seld til Skinney-Þinganes árið 2006 og þá var nafni skipsins breytt í Jóna Eðvalds og hefur Siggi verið annar tveggja skipstjóra á henni til dagsins í dag. 

2618. Jóna Eðvalds SF 200 ex Krossey SF 20. Ljósmynd Börkur Kjartansson.

Siggi og Þóra Ragnheiður ætla að flytja búferlum á Fáskrúðsfjörð. “Við erum að undibúa sölu á húsinu okkar í Hafnarfirði og ætlum að kaupa okkur hús fyrir austan” sagði Siggi og ekki var laust við að svolítillar eftirvæntingar gætti í röddinni. Hann sagði þau hjónin vera tilbúin til að flytja og þrátt fyrir að börn og barnabörn byggju á höfuðborarsvæðinu væri tilhlökkun í þeim að hefja nýjan kafla í sínu lífi.

Siggi er búinn að heilsa uppá áhöfnina á Hoffellinu og honum leist vel á. “Skipið er öflugt, vel við haldið og áhöfnin er flott” sagði hann og bætti því við að verkefnastaða Hoffellsins væri að jafnaði nokkuð góð og hann hlakkaði til að takast á við þau verkefni.

“Hefur þú komist í hann krappan á sjónum? “Nei, sem betur fer hef ég ekki gert það” svaraði skipstjórinn, “ég hef aldrei lent í sjóskaða og aldrei misst mann” sagði hann en sagði greinarhöfundi þó frá því að oft hefði Hornarfjarðarósinn yljað honum undir uggunum.  Það hafi á stundum þurft að gera allmargar tilraunir til að komast um ósinn áður en það tókst. 

En lífið er ekki eintóm sjómennska, þó að sjómennskan sé alls ekkert grín, eins og segir í dægurlagatextanum, hvað gerir Sigurður Bjarnason í tómstundum? “Ég hef mjög gaman af veiði.  Mest stunda ég stangveiði og svo veiði ég rjúpur líka” svaraði hann og bætti um betur með að segja frá þeim ám sem hann hefur rennt fyrir fisk í og fyrir amatör í hvers kyns veiðum líkt og greinarhöfundur er, má leiða að því líkum að árnar séu álíka margar og fiskimiðin sem hann hefur sótt um starfsævina.  “Og svo fótbolti, ég spilaði fótbolta með Völsungi þegar ég var ungur en nú læt ég mér nægja að fylgjast með mínum mönnum hjá Liverpool” sagði hann og brosið sem lýsti upp allt andlitið má vafalaust rekja til velgengni liðsins á dögunum “og svo hef ég gaman af því að fara á skíði” sagði hinn nýráðni skipstjóri á Hoffelli. 

En nú var tebollinn tómur, kaffið orðið kalt og fátt eitt eftir nema óska Sigga til hamingju með starfið og bjóða hann og Þóru Ragnheiði hjartanlega velkomin til Fáskrúðsfjarðar.

Sigurður Bjarnason í brúnni á Hoffelli. Ljósmynd Loðnuvinnslan 2019.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution