Sementsflutningaskipið Danavik

IMO 8221363. Danavik ex Klc Banshee. Ljósmynd KEÓ 2020.

Sementsflutningaskipið Danavik kom til Helguvíkur um helgina og tók Karl Einar Óskarsson hafnarvörður þessar myndir.

Danavik, sem siglir undir fána Marshalleyja, var smíða árið 1983. Það er 104 metrar að lengd og 16 metra breitt. Mælist 3,625 brúttótonn að stærð og er með heimahöfn í Majuro.

IMO 8221363. Danavik ex Klc Banshee. Ljósmynd KEÓ 2020.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution

Runólfur SH 135

2744. Runólfur SH 135 ex Bergey VE 544. Ljósmynd Óskar Franz 2020.

Runólfur SH 135 kom til löndunar á Grundarfirði í gær og tók Óskar Franz þessa mynd þá.

Runólfur SH 135 hét áður Bergey VE 544 og var smíðaður fyrir Berg-Hugin í Gdynia í Póllandi árið 2007. 

Guðmundur Runólfsson hf. í Grundarfirði keypti skipið, sem er 486 brúttótonn að stærð, í fyrra og nefndi Runólf SH 135.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Nýr Vilhelm sjósettur í Gdynia

Vilhelm Þorsteinsson EA 11. Ljósmynd Samherji.is 2020.

Nýr Vilhelm Þorsteinsson EA var sjósettur hjá skipasmíðastöðinni Kar­sten­sens Skibsværft í Gdynia í Póllandi hinn 12. júní síðastliðinn. 

Skrokkurinn var tilbúinn til sjósetningar fyrir átta vikum en vegna Covid-19 heimsfaraldursins var ekki að ráðist í hana fyrr en nú.

Á heimasíðu Samherja segir að skipið muni leysa af hólmi núverandi Vilhelm Þorsteinsson EA 11 sem kom nýr til landsins fyrir tveimur áratugum. Burðargeta skipsins verður um 3.000 tonn af kældum afurðum.

„Um er að ræða nýsmíði sem við höfum beðið eftir með töluverðri eftirvæntingu. Skrifað var undir samninga vegna smíði skipsins hinn 4. september 2018 en þann dag hefðu tvíburarnir Baldvin og Vilhelm Þorsteinssynir orðið 90 ára. Búnaður skipsins verður einstaklega góður, bæði hvað varðar veiðarnar sjálfar og meðferð aflans en einnig hvað varðar vinnuaðstöðu og vistarverur áhafnar,“ segir Kristján Vilhelmsson, framkvæmdastjóri útgerðarsviðs Samherja hf.

Sjósetningin fer þannig fram að hjólabúnaður er settur undir skrokkinn og hann „keyrður“ út á stóran flotpramma sem er síðan dreginn frá bryggjunni og út á nægilegt dýpi. Sjó er þá dælt í tanka prammans þannig að hann fer á kaf nægilega mikið til þess að skipið fljóti. Það er síðan dregið aftur að bryggju við skipasmíðastöðina.

Í byrjun síðustu viku, eftir sjósetninguna, voru tvær aðalvélar skipsins, stýrishúsið með einni íbúðarhæð undir og radarmastrið sett um borð. Nokkurra daga vinna er eftir við skipið í Gdynia en það verður svo dregið til Skagen í Danmörku og smíðin kláruð þar. Er búist við að smíði skipsins ljúki vel fyrir jól.

Starfsmenn Karstensens tóku myndband af sjósetningu Vilhelms Þorsteinssonar EA. Hlekkur á myndbandið: Sjósetning Vilhelms Þorsteinssonar EA.

Sigurborg SH 12

2740. Sigurborg SH 12 ex Vörður EA 748. Ljósmynd Óskar Frans 2020.

Togbáturinn Sigurborg SH 12 kom til löndunar á Grundarfirði í gær en það er FISK Seafood ehf. sem gerir hann út.

Samkvæmt frétt á heimasíðu fyrirtækisins var aflinn 71 tonn, uppistaða hans þorskur, skarkoli og ýsa en Sigurborgin var m.a að veiðum í Nesdýpi.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Bylgja VE 75

2025. Bylgja VE 75. Ljósmynd Jón Steinar Sæmundsson 2020.

Togskipið Bylgja VE 75 landaði í Grindavík í gærmorgun um 70 tonna afla, uppistaða þorskur og ufsi.

Hún hélt aftur til veiða um miðjan dag og tók Jón Steinar þessar myndir þá.

Bylgja VE 75 er gerð út af samnendu fyrirtæki sem Matthías Óskarsson stendur að en skipið var smíðað fyrir hann í Slippstöðinni á Akureyri og afhent árið 1992.

Bylgja VE 75 er 277 brl./437 BT að stærð og lengd hennar 36,63 metrar. Breiddin 8,60 metrar.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution