Andey ÍS 440

1980. Andey ÍS 440 ex Andey SF 222. Ljósmynd Olgeir Sigurðsson.

Rækjutogarinn Adney ÍS 440 er hér á toginu um árið en Frosti hf. í Súðavík keypti skipið frá Hornafirði og kom það til heimahafnar í marsmánuði 1994.

Haustið 1998 fór Andey til Gdansk í Póllandi þar sem skipið var upphaflega smíðað árið 1989. Erindið var m.a að láta lengja skipið sem var og gert um 12 metra. Þannig kom hún heim í byrjun febrúarmánaðar 1999. Eftir það mældist hún 331 brl. að stærð.

Andey ÍS 440 var seld til Færeyja árið 2008 þar sem hún fékk nafnið Beinisvörð TG 440.

Skipið fór í brotajárn fyrir nokkrum árum.

Í 5. tbl. Ægis árið 1989 er sagt frá komu Andeyjar SU 210 til Breiðdalsvíkur:

Andey SU 210 kom í fyrsta sinn til heimahafnar sinnar 10 apríl s.l. Skip þetta er smíðað sem skuttogari og er með búnaði til fullvinnslu afla um borð. Skipið er smíðað hjá Northern Shipyard í Gdansk, Póllandi, nýsmíði númer B 284, og er hannað afstöðinni í samvinnu við Ráðgarð hf. 

Andey SU kemur í stað Stakkavíkur ÁR 107 (247), sem væntanlega verður úrelt.Andey SU er í eigu Hraðfrystihúss Breiðdælinga hf., Breiðdalsvík.

Skipstjóri á skipinu er Guðmundur Ísleifur Gíslason og yfirvélstjóri Sigurður Vilhjálmsson. Framkvæmdastjóri útgerðar er Svavar Þorsteinsson.

Andey SU 210, sem var 211 brl. að stærð, var seld til Garðeyjar hf. á Hornafirði síðla árs 1990. Eins og fyrr segir var hún seld til Súðavíkur árið 1994.

Með því að smella á myndina er hægt að skoða hana í hærri upplausn.

By clicking on the images you can view them in higher resolution.

Brimnes SH 257

98. Brimnes SH 257 ex Magnús Kristinn GK 99. Ljósmynd Vigfús Markússon.

Brimnes SH 257 hét upphaflega Hilmir II KE 8 og var smíðaður árið 1963. Smíðin fór fram í Halsöy í Svíþjóð.

í 8. tbl. Faxa árið 1963 sagði svo frá:

Sunnudaginn 28. júlí í sumar kom nýr bátur til Keflavíkur, Hilmir II KE 8.

Báturinn er 110 lestir, smíðaður úr eik hjá J. W. Berg í Halsöy í Svíþjóð. Báturinn er búinn öllum fullkomnustu siglinga- og fiskileitartækjum og eru lestar klæddar aluminium, svo og eru skilrúm úr sama efni. Í bátnum er 470 ha. Kromhont dieselvél og gekk hann 10.5 sjómílur í reynsluferð.

Eigandi bátsins og framkvæmdastjóri er Sigurbjörn Eyjólfsson. Skipstjórinn, sem sigldi bátnum heim og verður með hann, er hinn kunni aflamaður, Einar Guðmundsson. 1. vélstjóri er Eiríkur Sigurðsson.

Hilmir II fór strax norður á síld og er nú fyrir stuttu kominn suður úr þeim leiðangri. Mun nú ætlunin, að hann fari á haustsíldveiðar við Faxaflóa.

Hilmir II var seldur Frosta hf. í Súðavík árið 1968 og fékk hann nafnið Valur ÍS 420. Sumarið 1972 kaupa Guðlaugur Guðmundsson, Óttar Guðlaugsson og Steinþór Guðlaugsson bátinn til Ólafsvíkur og nefna hann Jökulk SH 77. Í lok þessa árs er skráður eigandi Enni hf. í Ólafsvík.

Árið 1977 er sett í bátinn 650 hestafla GM dieselvél og 1980 er Jökull SH 77 seldur Guðjóni Bragasyni í Sandgerði. Hann nefndi bátinn Magnús Kristinn GK 99.

Stefán Hjaltason kaupir bátinnn aftur til Ólafsvíkur í febrúar 1982 og fær hann þá nafnið Brimnes SH 257.

Þann 3. september 1983 brann báturinn og sökk út af Jökli. Áhöfnin, fimm manns, bjargaðist í gúmmíbjörgunarbát og þaðan um borð í Saxhamar fra Rifi sem kom áhöfninni til lands. Heimild: Íslensk skip.

Með því að smella á myndina er hægt að skoða hana í hærri upplausn.

By clicking on the images you can view them in higher resolution.