Jóhannes Ívar KE 85

963. Jóhannes Ívar KE 85 ex Jónína ÍS 93. Ljósmynd Hafþór Hreiðarsson.

Jóhannes Ívar KE 85 hét upphaflega Ágúst Guðmundsson II GK 94 og var smíðaður í Danmörku árið 1963. Hann var 82 brl. að stærð en endurmældur síðar og mældist þá 75 brúttórúmlestir.

Eigendur voru Magnús, Ragnar og Guðmundur Ágústssynir en í lok árs 1974 varð hlutafélagið Valdimar til. Heimahöfn bátsins var í Vogum til ársins 1980 en þá var hann seldur Jóni Eðvaldssyni hf. í Sandgerði og fékk nafnið Sigurjón GK 49.

Árið 1986 var báturinn seldur Útveri hf. á Bakkafirði og fékk hann nafnið Ver NS 400. Það nafn bar hann til ársins 1988, þá um haustið var hann seldur til Flateyrar og fékk nafnið Jónína ÍS 93. Eigandi Brimnes hf. á Flateyri.

Það var svo haustið 1991 sem Ísnes hf. í Keflavík keypti bátinn og fékk hann það nafn sem hann ber á myndinni, Jóhannes Ívar KE 85.

Samkvæmt vef Fiskistofu fékk báturinn nafnið Júlíus ÁR 111 í nóvember árið 1993. Eigandi Hólmar Víðir Gunnarsson.

Afskráður af skipaskrá á tímabilinu 1. des 1994-31. mars 1995.

Með því að smella á myndina er hægt að skoða hana í hærri upplausn.

By clicking on the images you can view them in higher resolution

Wilson North kom í morgun

IMO 9430947. Wilson North. Ljósmynd Hafþór Hreiðarsson 2021.

Flutningaskipið Wilson North kom til hafnar á Húsavík á níunda tímanum í morgun og lagðist að Bökugarðinum.

Skipið, sem er 123 metrar á lengd og 16 metra breitt, kom með trjáboli til PCC á Bakka. Það mælist 6,118 GT að stærð.

Wilson North var smíðað árið 2010 og siglir undir Maltnesku flaggi með heimahöfn í Walletta.

Með því að smella á myndirnar er hægt að skoða þær í hærri upplausn.

By clicking on the images you can view them in higher resolution